Saturday, August 2, 2008

Kan Ako Sadit Pa

Labas pa sa memorya ko itong panahon kan ako sadit pa. Iba man ang kasaradayan kato sa presenteng henerasyon.Ngonian kadakul na ang palalain kan kaakian. Dai ko man baya maiwasan na dai maikumpara ang buhay kaitong panahon sa buhay kan kasaradayan ngonian. Punan ko sa gobing. Ako kaito nag-sagrat sa maawot na warang kalson. Tuda kaya an darakupan mi kaito kan mga kakawat ko. Lalu na pag idiklum, magayunon na mag taraguan. Ta ako maniswakon kan saday (maski gaud ngonian) kaurag-uragi ako mag-luok. Maski sa puon kan kalunggay nakapa-ipli ako. Minsan man isakat ko so mangga sa higudan, ultimo talaga akong minabutwa. Minauli ako sa harung malalaun buda payt ang panga-gaw ta nabasol. Ramug ang bilog kong hawak ta mala ngani warang kalson. Si May kaito medyo maisug pa. Ikurusing ngani an singit ko ta an karaw ko daa palabaw. Ngonian wara na so kurusing ni may. Tamuyaw na sana ang sakong isapar.

Naging uso man kaito so paputok, sumpit, tagpanaw buda trumpo. Rumdom ko pa so gira kan libod buda tubog sa paputok.Sabihon ta nang toy gun ini kan kasaradayan ngonian. Ang pagkakaiba lng kan duwa - ang bala kan toy gun plastik na bulitas, ang paputok papel na dumog. Pero kun kulog ang pag hururunan, mas ma-aray ka sa paputok. Asi probare.

Tisuhon man so trumpo na guinibo sako ni pay. Lingaw ko ugaring kun sain na kahoy ito guibo. Ihagbok ko ngani so trumpo kan kalaban ko, ilasik na byu. Kaurag uragi talaga so trumpo ni Pay. Ginamitan panu ki katam buda tinais nin husay kaya balanse an talibong. Nun ka nanggad mag-kibang kibang.

Ang kaabang abang ko kaito an aldaw na mapadagat kami. Ilakaw mi lang ang Roca Baluarte. Malinigon pa kato ang roca.Bako arug ngonian. Dyan ako nakaukod mag palataw buda mag-indakay. Pirang beses man ako dyan nadutan ki laping laping buda nasisi. Romdom ko man pag ako nuno-on, tigpapa-balad ako dyan ni May dangan ipakarigos. Ang likod ko kato tig gagapo nya nin dumog na baybay naning daa mahakla so hilaw na plema. Aw ta sa ika sunod na aldaw masiramun man nanngad ang kadhad ko. Minalagauk talga ang sipon ko sa liog. So sabi baga nindang suwaan.

Hayy... Namimiss ko na ang Bacacay. Tama na ta ang puso kong malumoy namumundo ng gayo. Pangadyi ko lng - sana sa mga masunod na aldaw manupar ko guiraray so mga kakawat ko. Asin maka-iba sinda sa lugar kun sain nag puon an gabos- Bacacay.

8 comments:

araxi rei xian said...

ngunyan padi iba naman ang pigkakawatan ta ade?

ngunyan kung nuarin banggi saka man kita maluwas.. sisurod man nangad ang gabos na tinampo kang barangay tano daw ang pighahanap?

hehehe

pati taraguan iba na. kaipuhan duwa na kamong magkaiba magtago sa madiklom..

hmmmnnnn..

gusto mo ini bako?

hehehehe

M. F. Victori said...

perfect na naman ang voka n ati...harararumon...

letse!

Ryan Baliza said...

hahaha... Mga PAKA kamu!!!

atomicgirl said...

Hanep. Bikulon na maray nadipisilan ako magbasa. Iyo na talaga ang problema ko ta maluya ako magbasa ki arog kaini. Patarama na sana ako ta marahayrahay lamang. Miss you ba bebekah!

Ryan Baliza said...

tigtesting ko lng peach kun kaya ko mag bikol na pang-tander. hahaha. miss u too lilivik.....

WishbonE said...

hararumon man.. dae ko daw matungkad...hahaha
maurag talaga minasurat...

Ryan Baliza said...

helo wishbone... do we know each other? hehehe.. pls identify.. tnx

PARiKoPAREko said...

Magayon ang saimong guinibo sa blog.
Papagdanayon ang karahayan maski saen kita magduman.
Ang Dios ang darahon sa buhay.